Монгол Улсад 35 тэрбум төгрөгийн хохирол учруулсан "Саусгоби Сэндс” компанийн гүйцэтгэх захирал Жастин Капла, Филиппин улсын иргэн Кристобал Ж.Дэвид, Хилармон В.Кажуком нар нутаг буцсан. Монгол Улсын шүүхээс тэднийг татвараас зайлсхийсэн хэргээр 5.6-5.10 жилийн хорих ял оноож, Монгол Улсын Сангийн яаманд учруулсан 35 тэрбум гаруй төгрөгийн хохирлоо буцаан төлөх шийдвэр гаргасан юм.

Шүүхийн шийдвэр гарсан даруйд Жастин Капла нарыг ШШГЕГ-ын харьяа цагдан хорих 461 дүгээр ангид саатуулсан. Харин тэд Монгол Улсад 35 тэрбум төгрөг учруулсаныхаа төлөө монголын шоронд 20 гаруй хоног хоригдоод суллагдсан юм. Учир нь Жастин Капла нар анхан шатны шүүхийн шийдвэр гарсны дараа Монгол Улсын Ерөнхийлөгчөөс уучлал хүссэнээр Ерөнхийлөгч Ц.Элбэгдорж тэдэнд уучлал үзүүлж тэд эрх чөлөөтэй иргэд болов.

Харин тэд Монгол Улсад учруулсан хохирлоо 35 тэрбум төгрөгийг эргэн төлөхгүй хэмээн Эрүүгийн хэргийн давж заалдах шатны аравдугаар шүүхэд хандсан. Тодруулбал, шүүх хэт нэг талыг барьсан, шинжээчдийн дүгнэлт худлаа гарсан гэх мэт үндэслэлүүдээ шүүхэд гаргаад байсан юм. Тэгвэл тэдний хэргийг ирэх лхагва гариг буюу энэ сарын 25-нд Эрүүгийн хэргийн давж заалдах шатны аравдугаар шүүхэд хэлэлцэхээр боллоо. Хурлаар тэд Монгол Улсын Сангийн яаманд учруулсан 35 тэрбум төгрөгөө эргүүлэн төлөх эсэх, анхан шатны шүүх хэргийг үнэн зөв шийдсэн эсэхийг хэлэлцэхээр болсон байна. Хэрэгт шүүгчээр тус шүүхийн шүүгч С.Соёмбо-Эрдэнэ оролцоно.

Юутай ч анхан шатны шүүхээс Жастин Капла нарыг татвараа нуун дарагдуулж, татвар төлөхөөс зайлсхийж, Монгол Улсад 35 тэрбум төгрөгийн хохирол учруулсанг тогтоосон. Гэм буруутайг нь тогтоочихоод байхад Ерөнхийлөгч Ц.Элбэгдорж "Монголоо хараалгаад суух уу, өөрийгөө хараалгах уу. Монголоо бодох уу, өөрийгөө бодох уу” гэсээр өөрийгөө хараалган байж уучлал үзүүлсэн. Харин Жастин Капла нар манай улсад учруулсан хохирлоо хүртэл эргэн төлөх эсэхийг Эрүүгийн хэргийн давж заалдах шатны аравдугаар шүүх хэрхэн шийдэх нь ирэх лхагва гаригт тодорхой болно.