Та нар мэднэ дээ, зарим бүсгүйчүүд нэг үерхсэн залуутайгаа 2,3 жил хамт байсаар байдаг бол зарим нь учирсан залуу болгонтойгоо хэдэн сараас хэтэрдэггүйг. Цэвэр тохиолдол уу эсвэл үнэхээр өөр шалтгаан байна уу?

Энэ талаар оюутан дүү маань надтай эхэлж яриа дэлгэлээ. Тэдний ангийн нэг охин амьдралдаа 2 л залуутай үерхсэн ч эхнийхтэй нь 3 жил, хоёр дахьтай нь үерхээд 1 жил болж байгаа аж. Харин дүү маань 3 сараас илүү хугацаагаар нэг хүнтэй тогтвортой харилцаатай байж үзээгүй. Дүү маань хорин хэдхэн настай, урд нь амьдралын уртаа зам хүлээж байгаа хэдий ч яг ийм ялгаа бүсгүйчүүдийн дунд үнэхээр байдаг болохоор би энэ талаар бичихээр шийдсэн юм.

Миний ажигласнаар тогтвортой харилцаагаа удаан хадгалж чаддаг бүсгүйчүүдийн ихэнх нь бидний тодорхойлдгоор "даруухан” байдаг. Харин нөгөө бүлгийн бүсгүйчүүд нь ихэвчлэн гадаад үзэмжиндээ анхаарч, эрчүүдийн талаарх сэдвийг хэзээ ч тойрч гардаггүй байх аж. Гэхдээ зөвхөн үүгээр тодорхойлбол хэтэрхий өрөөсгөл болох болохоор доорх 6 өөр талуудыг жагсаан бичлээ. Хэрвээ чи тогтвортой харилцаа үүсгэх тал дээр нэг л болж өгөхгүй байгаа бол "үерхлийн мастер” бүсгүйчүүдийн эдгээр чадваруудаас суралцаарай:

1. Юуны өмнө тогтвортой харилцаа үүсгэж чаддаг бүсгүйчүүдийн толгойд огт өөр зүйлс эргэлдэж байдаг. Өөрөөр хэлбэл хоол идэж байгаа ресторанд нь царайлаг залуу орж ирэх үед тэр түүний анхаарлыг татах гэж хичээхгүй, зүгээр л хоолоо иднэ эсвэл ажлынхаа төлөвлөгөөг гаргаж сууна. Харин тогтвортой харилцааг амжилтанд хүргэж чаддаггүй бүсгүйчүүдийн ихэнх нь ийм нөхцөлд тэр залуугийн суугаа ширээний урдуур заавал дайрч, 00 өрөө орохоор явна. Тэр мэдээж сайхан хувцасласан байгаа учраас өөртөө тун итгэлтэй алхана. Энэ нь нэг төрлийн анхаарал татах гэсэн оролдлого юм. Гэхдээ иймэрхүү үйлдлийг тусдаа зорилгогүйгээр хийдэг буюу үнэхээр 00 орохоор явах бүсгүйчүүд ч бий. Тэдэнд бусдын анхаарлын төвд байх нь тийм ч хэцүү бишээс гадна тусгайлан хэн нэгнийг өөртөө татах зорилгогүй байдаг. Мөн мэдээж түүний толгойд огт өөр зүйл эргэлдэж байгаа.