ЭЛСЭГЧИД, ИРГЭДИЙГ ТӨӨРӨГДӨЛД ОРУУЛЖ БАЙГАА ИХ, ДЭЭД СУРГУУЛИЙН НЭРИЙГ ЦЭГЦЭЛЬЕ

Бичсэн:zulaa
2018/06/11/, 16:47

Өнгөрсөн жил нутгийн хоёр хөгшин "Манай бага охин МУИС-д элсэн орж суралцаж байгаа” гээд сайрхаж яриад байсан.

Хэдхэн хоногийн өмнө нөгөө охинтой нь Гандангийн ойролцоо тааралдаж мэнд мэдэлцэж ойр зуурын юм ярьсан юм. Өнөө охин "Манай сургууль энэ шүү дээ. Энэ жил нэгдүгээр курсээ төгсөх гээд шалгалт шүүлэг ихтэй байна” гээд Монголын үндэсний их сургууль буюу /МҮИС/-ийг гараараа заав. Би ч өлгөж аваад "Өө чи чинь МУИС-д сурдаггүй юмуу, өнгөрсөн зун нутагтаа очиход аав ээж хоёр чинь манай охин Монгол Улсын их сургууль авсан гээд яриад байсан даа” гэв. Охин ч "Үгүй ээ, эгчээ МҮИС-ийн нягтлангийн ангид орсон” гэлээ.

Энэ ярианаас нэг зүйлийг анзаарав. Иргэд болоод элсэгчид МҮИС, МУИС хоёрыг их андуурдаг юм байна.

Нээрээ л харахаар товчилсон нэр нь иргэдийг төөрөгдөлд оруулж, андуурагддаг ажээ. Олон улсын байгууллагад ч энэ хоёр сургуулийн нэр томъёо андуурагддаг талаар салбарын яамны хэвлэлийн ажилтан нь цахим хуудсандаа бичжээ.

Тодруулбал, МУИС-д хаягласан гадны захиа замдаа төөрч, МҮИС гэдэг сургууль руу явчаад 14 хоногийн дараа МУИС дээр иржээ. Энэ талаар МУИС-ийн багш, ажилчид салбарынхаа сайдад их гомдол мэдүүлдэг юм байна. Тиймээс хаяг, нэршлийн асуудлыг ч цэгцлэж өгөхийг хүсчээ.

Хэдий бид өрсөлдөөн дунд амьдардаг ч гэлээ, нэгнээ хуулбарласан маягтай, нэр олдохгүй байгаа мэт ингэж нэгнээ үг, үсгийн ялгаагаар хуулбарлаж баймааргүй санагдах юм. Үүсэл, хөгжил, сургуулийн бодлого нь өөр ч гэлээ хөдөөнийхөн төдийгүй нийслэлийнхэн энэ хоёр сургуулийг андуурч их будилдаг байна. Монголын үндэсний их сургууль орон нутагт гэхэд элсэлтийн шалгалтын үеэр эцэг эхчүүд, хүүхдүүдийг төөрөлдүүлж гадаа нь бүртгэл хийгээд л элсүүлээд байдаг нь үнэн. Үүнийг нь мэргэжлийн залиланг гэж тайлбарлах ч өмнөх сайдуудын алдаа гэж дүгнэж буй.

Одоо хэдхэн хоногийн дараа хүүхдүүдийн их, дээд сургуульд элсэх шалгалт эхэллээ. Сайн мэдээлэл, мэдлэггүй хүүхэд анзаарахгүйгээс болж МУИС-д тэнцлээ гэж бодож яваад МҮИС-д орсон байвал яах вэ. Эндээс л бүх юм эхэлнэ шүү.

Нөгөөтэйгүүр хувийн их, дээд сургуульд Үндэсний гэдэг нэршил ахадсан байхыг үгүйсгэхгүй. Улсад үндэсний их сургууль ганц л байх ёстой.

Хамгийн гол нь энэ хоёр сургуульд нэйшнл гэдэг үг орсонд учир байгаа юм. Багаар бодоход төөрөгдөл, томоор бодоход гадныхны элэг доог болох нэг сайхан шалтгаан болоод байна гэдгийг учир мэдэх хүмүүс тайлбарлаад байгаа. Эндээс харахад нэршил тойрсон луйвар, залилан гэж ойлгож болно доо.

Уг нь энэ нэршлийн асуудал 2013 онд сөхөгдөж, их яригдаж байсан юм. Тухайн үед ШӨХТГ-аас Монголын Үндэсний их сургуулийг нэрээ өөрчлөхийг шаардаж байсан. Тодруулбал, Монгол Улсын их сургууль гэсэн ижил төстэй нэрийг бусад хуулийн этгээд буюу Монголын үндэсний их сургууль улсын бүртгэлд бүртгүүлэн ашиглаж байсан нь тогтоогдсон.

Шалгалтаар Монгол Улсын их сургууль нь 1942 онд үүсгэн байгуулагдсан, нийтийн өмчид суурилсан олон улсад "The National University of Mongolia” гэсэн англи нэрээр танигдсан байтал дээрх сургууль хуулийн этгээдийн нэрийг 2012 онд улсын бүртгэлд бүртгүүлж мөн нэрийг ашигладаг байсан нь тодорхой болжээ.

Энэ байдал нь Өрсөлдөөний тухай хуулийн 12.1.4-т ”...аж ахуй эрхлэгчийн нэр,....-ийг хуулбарлах-ыг хориглоно гэсэн заалтыг зөрчсөн тул тус сургуулийг нэрээ солихыг үүрэг болгосон ч өнөөдрийг хүртэл 6 жилийн хугацаанд нэрээ солиогүй л байна.

Хамгийн гол нь МҮИС нэрээ МУИС-ийн нэр болгон барьж бусдыг төөрөгдүүлж, итгэлүүлж, элсэлт авахгүй байхыг Үндэсний их сургуулиас хүсье. Түүнчлэн салбарын сайд нь энэ асуудлыг анхааралдаа авч, цэгцлэхийг бас хүсч байна.

О.Сайхан

24news.mn

Төстэй мэдээллүүд

Их, дээд сургуулиудын босго оноо хэд вэ

2017/06/28, 09:45

ИХ, ДЭЭД СУРГУУЛИУДЫН БОСГО ОНОО ХЭД ВЭ

2017/06/28, 09:10

Бүртгэл нэрээр ЭЕШ байтугай төгсөх шалгалтаа өгөөгүй хүүхдүүдээс мөнгө хураах нь зөв үү

2017/03/31, 10:44

"Ухаалаг утас"-аар далласан МҮИС төгсөгчдийн тархийг угаасаар...

2015/06/24, 11:06

Сэтгэгдэл

АНХААРУУЛГА: Уншигчдын бичсэн сэтгэгдэлд www.CHUHAM.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 7711-0505 утсаар хүлээн авна.