УИХ-ын чуулганы хуралдаан 10.26 цагт 51.3 хувийн ирцтэйгээр эхэлсэн. Энэ долоо хоногт УИХ дахь намын бүлгүүд болоод байнгын хорооны хуваарьт хуралдаанууд хуралдаагүй.

Тэгвэл өчигдрийн чуулганы хурлаар есөн асуудлыг хэлэлцэх товлосон байсан ч долоон асуудлыг хэлэлцэв. Нэгдсэн хуралдааны эхэнд Монголын Улаан Загалмайн Нийгэмлэгийн эрх зүйн байдлын тухай шинэчилсэн найруулгын төслийг хэлэлцэж 83.7 хувиар дэмжлээ. Харин 2005 онд батлагдсан Монголын Улаан Загалмайн Нийгэмлэгийн эрхзүйн байдлын тухай хуулийг гишүүдийн 70.5 хувийн саналаар цуцаллаа. 

Үргэлжлүүлэн Х.Тэмүүжин гишүүний өргөн мэдүүлсэн Үндсэн хуулийн цэцийн тухай хуульд нэмэлт өөрчлөлт оруулах тухай хуулийн төслийн хэлэлцүүлэг дуусч санал хураалт явлаа.

Хуулийн төсөлд нэмэлт өөрчлөлт оруулах саналыг УИХ-ын гишүүдийн олонхи нь дэмжсэн юм. Ингэснээр Цэцийн гишүүд 65 нас хүрээд тэтгэвэрт гарахаар болж байна. 

Цэцийн гишүүд 65 нас хүрээд тэтгэвэрт гарахаар болж байна. 

Хуулийн төсөлтэй холбогдуулан Цэцийн гишүүдийн нас маргаан дагуулсан юм. Хэлэлцүүлгийн шатанд УИХ-ын гишүүн Ц.Нямдорж "Үндсэн хуулийн Цэц /ҮХЦ/-ИЙН гишүүний зургаан жилийн хугацааг улс төрийн зорилгоор зөрчдөгийг болимоор байна. Үндсэн хуулийн Цэцийн гишүүдийг биш Үндсэн хуулийг хамгаалж хэлж байгаа юм шүү. 

Мөн Үндсэн хууль тогтвортой байхын тулд Цэцийн гишүүд нь тогтвортой байх ёстой. Хоёрдугаарт, байнга ялагч байхын тулд хийсэн ажил чинь өөрийн толгой дээр мөндөр болж буух үе байдаг. АН-ынхан үүнийг сайн бодоорой. Цэцийн гишүүдийг хугацаанаас нь өмнө явуулах гэж байгаа оролдлого чинь эргээд мөндөр болж бууна шүү. Зургаан жилийн хугацаагаар томилогддог хүмүүс гэж шүүмжилж байна.

Үндсэн хуулийн Цэцийн гишүүнээр томилогдсон хүмүүсийн буруу биш. Зургаан жилээр томилох тухай Үндсэн хуульд заачихсан байгаа” гэв.

Харин УИХ-ын гишүүн Д.Ганхуяг "Энэ хуулийн төслийг дэмжиж байна. ҮХЦ буруу ажиллаад байгаа нь саяхан нэг жишээгээр тогтоогдсон. Огт хамаагүй заалт бариад асуудлыг улам ээдрээтэй болгосон тал байгаа шүү. Үнэхээр Цэцийн шийдвэр гаргах ил тод байдлын тухай процесс нь хэр зэрэг хангагдсан бэ гэдгийг хамгийн түрүүн бодолцох цаг иржээ. Хоёрдугаарт, Цэцийн гишүүдийн тэтгэвэрт гарах нөхцөл нь өөр байдлаар явах гээд байна. Ингээд ирэхээр бусад төрийн албан хаагчид дагалдвал төсөвт дарамт учруулах юм бишүү. Цэцийн гишүүд бусдын жишгээр 60 насандаа тэтгэвэрт гарах нь зүйтэй” гэлээ.

Үүний дараа Арбитрын тухай /шинэчилсэн найруулга/ болон холбогдох бусад хуулийн төслүүдийг хэлэлцээд "хэлэлцэх нь зүйтэй” гэдэг асуудлаар санал хурааснаар 49 гишүүн оролцож, 39 гишүүн дэмжсэнээр анхны хэлэлцүүлэгт бэлтгүүлэхээр Байнгын хороонд шилжүүлснээр чуулганы үдээс өмнөх хуралдааныг завсарлууллаа. 

Үдээс хойшхи УИХ-ын чуулганы хуралдааны эхэнд Захиргааны ерөнхий хууль батлагдсантай холбогдуулан бусад хуульд нэмэлт, өөрчлөлт оруулах тухай хуулийн төслийг дэмжиж, анхны хэлэлцүүлгийг хийлгэхээр Хууль зүйн байнгын хороо руу шилжүүлсэн.

Дугаар шилжих мөчид УИХ-ын чуулганы хуралдаанаар Боловсролын тухай хуульд нэмэлт, өөрчлөлт оруулах тухай болон холбогдох бусад хуулийн төслүүдийг хэлэлцэж байлаа.