-Хэлний том эрдэмтэд, багш нар маань ном зохиол сайн унш гэж хэлдэг байлаа. Номыг хүн хоёр янзаар уншдаг. Нэгдүгээрт, олон ном уншчихдаг хүн байна. Энэ хүн уншсан зүйлээрээ биеэ хуягладаг. Хоёрдугаарт, мөн олон ном уншдаг ч түүнээс өөрийн билгийг нээх зорилго тавьдаг хүн байдаг. Энэ юу гэсэн үг вэ гэвэл, уран зохиолын нэг ном уншлаа гэхэд түүнээс дотоод сэтгэлдээ баялаг бүрдүүлдэг. Өөрөөр хэлбэл, тэр хүний бодож байсан боловч гаргаж хэлж чадахгүй байсан үг өгүүлбэр, санаа тэнд байна. Ингэж ном уншихаар дамжуулан өөрийн билгийг нээх нь ном уншихын эцсийн зорилго байх гэж би боддог.

Эсвэл мянган ном уншиж өөрийгөө номын сан шиг болгочхоод дотоод билиг чадлаа нээгээгүй байвал зүгээр нэг хураалгатай номтой л адил. Тиймээс хүүхэд, залуустаа хандаж хэлэхэд, ном их унших хэрэгтэй. Манай залуус интернетийн хөгжлийг даган баясаад "Бид нэг үеэ бодвол дэлхийтэй ойр боллоо. Дэлхий бараг бидний хоёр гар доор байна. бүх юмыг мэдэж болно” гэдэг. Хэцүү зүйл нь энд маш их мэдээлэл байгаа ч аль нь зөв,буруу, аль нь өөрт зохих, зохихгүй гэхчлэн ялгахад бэрх. Бурууг дагавал буруу болчихно.

Цахим орчин сэрж байгаа цагт өндөр хяналтаар гарч ирсэн мэдээлэл ховор. Хэн ч тэнд бичиж болно. Судалгаа, шинжилгээний материал бичиж буй хүн хэзээ ч тэндээс тоо, баримт авч болохгүй. Тэнд шинжлэх ухааны үнэ цэнэ дутмаг. Тиймээс залуучууд цахим орчинд найдаж, бүхнийг мэдчихлээ гэх нь учир дутагдалта